Служба 23 марта 2026 года 2025 года — Мч. Кодрата и дружины его.

ПОСЛЕ́ДОВАНИЕ БОГОСЛУЖЕ́НИЯ

23 ма́рта 2026 года.

Понеде́льник 5-й седми́цы. Мч. Кодра́та и дружины его.

НА 9-М ЧА́СЕ:

Тропари́:

Тропа́рь воскре́сный, глас 8:

С высоты́ снизше́л еси́, Благоутро́бне, погребе́ние прия́л еси́ тридне́вное, да нас свободи́ши страсте́й, Животе́ и Воскресе́ние на́ше, Го́споди, сла́ва Тебе́!

Сла́ва Отцу́ и Сы́ну и Свято́му Ду́ху.

Тропа́рь мучеников, глас 1:

Боле́зньми святы́х, и́миже о Тебе́ пострада́ша, умоле́н бу́ди, Го́споди, и вся на́ша боле́зни исцели́, Человеколю́бче, мо́лимся.

Конда́к:

Конда́к воскре́сный, глас 8:

Воскре́с из гро́ба, уме́ршыя воздви́гл еси́, и Ада́ма воскреси́л еси́, и Е́ва лику́ет во Твое́м Воскресе́нии, и мирсти́и концы́ торжеству́ют е́же из ме́ртвых воста́нием Твои́м, Многоми́лостиве.

ВСЕДНЕ́ВНАЯ ВЕЧЕ́РНЯ

Кафизмы нет.

СТИХИ́РЫ НА ГО́СПОДИ ВОЗЗВА́Х, ГЛАС 8:

Канона́рх: Глас осьмы́й, Го́споди, воззва́х к Тебе́, услы́ши мя.

Хор: Го́споди, воззва́х к Тебе́, услы́ши мя. Услы́ши мя, Го́споди. Го́споди, воззва́х к Тебе́, услы́ши мя: вонми́ гла́су моле́ния моего́, внегда́ воззва́ти ми к Тебе́. Услы́ши мя, Го́споди.

Да испра́вится моли́тва моя́, я́ко кади́ло пред Тобо́ю, воздея́ние руку́ мое́ю – же́ртва вече́рняя. Услы́ши мя, Го́споди.

Стихи́ры окто́иха, глас 8:

На 10. Стих: Изведи́ из темни́цы ду́шу мою́, испове́датися и́мени Твоему́.

Тебе́ Царя́ и Влады́ку, А́нгели непреста́нно воспева́ют, а́з же Ти́ припа́даю, я́ко мыта́рь зовы́й: Бо́же, очи́сти мя́, и поми́луй мя́.

Стих: Мене́ ждут пра́ведницы, до́ндеже возда́си мне.

Безсме́ртна су́щи душе́ моя́, волна́ми жите́йскими не покрыва́йся, но возни́кни вопию́щи к своему́ Благода́телю: Бо́же, очи́сти мя́, и спаси́ мя.

На 8. Стих: Из глубины́ воззва́х к Тебе́, Го́споди, Го́споди, услы́ши глас мой.

Егда́ прииму́ во уме́ мно́жество соде́янных мно́ю зо́л, и в помышле́ние прииду́ стра́шнаго о́наго испыта́ния, тре́петом содержи́мь к Тебе́ прибега́ю Человеколю́бцу Бо́гу. Те́мже не пре́зри мене́, молю́ Тя́, Еди́не Безгре́шне: да́руй умиле́ние смире́нней мое́й души́ пре́жде конца́, и спаси́ мя.

Стих: Да бу́дут у́ши Твои́ вне́млюще гла́су моле́ния моего́.

Сле́зы ми́ да́ждь Бо́же, я́коже иногда́ жене́ гре́шнице: и сподо́би мя́ омочи́ти но́зе Твои́, я́же мя́ от пути́ пре́лести свободи́вшия, и ми́ро благоуха́ния Тебе́ приноси́ти житие́ чи́сто, покая́нием ми́ созда́нное, да услы́шу и а́з жела́емый Тво́й гла́с: ве́ра твоя́ спасе́ тя, иди́ в ми́ре.

Стихи́ры Трио́ди, глас 3:

На 6. Стих: Аще беззако́ния на́зриши, Го́споди, Го́споди, кто постои́т? Яко у Тебе́ очище́ние е́сть.

Вели́кия, ве́рнии, во вре́мя пока́жем воздержа́ния труды́, я́ко да сла́ву вели́кую получи́м, ми́лостию вели́каго Бо́га избавля́еми пла́мене гее́нскаго.

Стих: Имене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Вре́мя поще́ния ны́не преполови́вше, нача́ло боже́ственнаго жития́ я́ве пока́жем, и в коне́ц доброде́тельнаго жи́тельства дости́гнути те́пле потщи́мся, я́ко да прии́мем сла́дость нестаре́емую.

И́на стихи́ра Трио́ди, глас 7:

На 4. Стих: От стра́жи у́тренния до но́щи, от стра́жи у́тренния, да уповае́т Изра́иль на Го́спода.

Преполови́вше се́й свяще́нный поще́ния пу́ть, к бу́дущему ра́достию потеце́м, благотворе́ния еле́емъ ду́ши пома́завше, я́ко да сподо́бимся Христа́ Бо́га на́шего и Боже́ственным Страсте́м поклони́тися, предвари́ти и стра́шное, и свято́е Воскресе́ние.

Стихи́ры мученика, глас 1:

Стих: Яко у Го́спода ми́лость, и мно́гое у Него́ избавле́ние,
и Той изба́вит Изра́иля от всех беззако́ний eго.

С прехва́льным Кодра́том да воспое́тся све́тло Киприа́н вели́кий, Диони́сия два и Ане́кт досто́йно, Криск вку́пе и сла́вный Па́вел ве́рно, я́ко страда́льцы Госпо́дни Боговенча́нны и моли́твенницы на́ши тепле́йшии.

На 2. Стих: Хвали́те Го́спода вси язы́цы, похвали́те Его́ вси лю́дие.

Священнопобе́дных му́чеников и победоно́сных лик дне́сь други́й яви́ся, озаря́ющ собо́р Боже́ственных страстоте́рпец, тве́рдое число́, избра́нное во́инство, ему́же нача́льствует Кодра́т, благосла́вный победи́тель проявля́емь.

Стих: Яко утверди́ся ми́лость Его́ на нас, и и́стина Госпо́дня пребыва́ет во век.

Ри́торския у́бо му́дрости многопи́санная плете́ния сечи́тельным твои́м сло́вом разори́л еси́, я́ко мглу, прехва́льный Кодра́те, науча́еши ве́рно и стра́ждеши терпели́вно за Христа́, во обои́х благоукраша́яся и вку́пе со страстоте́рпцы венча́емь.

Сла́ва и ны́не, Богоро́дичен, глас то́йже:

Одержи́мы прегреше́нии ненаде́жными, Чи́стая, Тя Предста́тельницу еди́ну стяжа́вше, Де́во, вопие́м благода́рственно: очи́сти ны, Пресвята́я Богоневе́сто, Ты бо еси́ ми́ра прибе́жище и заступле́ние ро́да на́шего.

ВХОД С КАДИ́ЛОМ:

ПРОКИ́МЕН ВЕЧЕ́РНИ:

Диа́кон: Проки́мен вели́кий, глас 8: Нe oтврати́ лица́ Твoeго́ oт о́трoка Твoeго́, я́кo cкoрблю́, cко́рo уcлы́ши мя: вoнми́ души́ мoе́й, и изба́ви ю́.

Хор: Нe oтврати́ лица́ Твoeго́ oт о́трoка Твoeго́, я́кo cкoрблю́, cко́рo уcлы́ши мя: вoнми́ души́ мoе́й, и изба́ви ю́. (На каждый стих прокимна)

Стих 1: Cпаcе́ниe Твoе́ Бо́жe да прии́мeт мя.

Стих 2: Да у́зрят ни́щии, и вoзвeceля́тcя.

Стих 3: Взыщи́тe Бо́га, и жива́ бу́дeт душа́ ва́ша.

Диа́кoн: Нe oтврати́ лица́ Твoeго́ oт о́трoка Твoeго́, я́кo cкoрблю́.

Хор: Ско́рo уcлы́ши мя: Вoнми́ души́ мoе́й, и изба́ви ю́.

СТИХИ́РЫ НА СТИХО́ВНЕ, ГЛАС 7:

Канона́рх: Глас седьмы́й, Виногра́д насади́вый и де́латели призва́вый.

Стихи́ры Трио́ди, глас 7:

Хор:

Виногра́д насади́вый и де́латели призва́вый, бли́з е́сть Спа́с. Прииди́те, поще́ния подви́жницы, мзду́ восприи́мем, я́ко бога́т е́сть Да́вец и ми́лостив: ма́ло де́лавше, прии́мем душе́вную ми́лость.

Стихи́ры Трио́ди, глас 6:

Сти́х 1: К Тебе́ возведо́х о́чи мои́ Живу́щему на Небеси́. Се я́ко о́чи ра́б в руку́ госпо́дий свои́х, я́ко о́чи рабы́ни в руку́ госпожи́ своея́: та́ко о́чи на́ши ко Го́споду Бо́гу на́шему, до́ндеже уще́дрит ны.

В разбо́йническия по́мыслы впа́д Ада́м, прельсти́ся умо́м и уязви́вся душе́ю, лежа́ше на́г заступле́ния. Ни свяще́нник же, пре́жде зако́на, вня́т ему́, ниже́ леви́т, по зако́не, воззре́в на́нь, то́кмо Ты́, прише́дый Бо́же, не от Самари́и, но от Богоро́дицы, Го́споди, сла́ва Тебе́!

Сти́х 2: Поми́луй нас, Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих: и уничиже́ния го́рдых.

Му́ченицы Твои́, Го́споди, не отверго́шася Тебе́, ни отступи́ша от за́поведей Твои́х, те́хъ моли́твами поми́луй на́с.

Сла́ва и ны́не, Богоро́дичен, глас то́йже:

Арха́нгельски воспои́м, ве́рнии, небе́сный черто́г и две́рь запеча́танну вои́стинну: ра́дуйся, Ея́же ра́ди отрасте́ на́м Спа́с все́х Христо́с, Жизнода́вец и Бо́г; низложи́, Влады́чице, мучи́тели, безбо́жныя враги́ на́ша, руко́ю Твое́ю, Пречи́стая, упова́ние христиа́н.

ТРОПАРИ́ ПО ТРИСВЯТО́М:

Тропарь (постовым напевом), глас 4:

Богоро́дице Де́во, ра́дуйся, Благода́тная Мари́е, Госпо́дь с Тобо́ю: благослове́нна Ты в жена́х, и благослове́н Плод чре́ва Твоего́, я́ко Спа́са родила́ еси́ душ на́ших.

(Поклон)

Сла́ва:

Крести́телю Христо́в, всех нас помяни́, да изба́вимся от беззако́ний на́ших: тебе́ бо даде́ся благода́ть моли́тися за ны.

(Поклон)

И ны́не:

Моли́те за ны святи́и апо́столи, святи́и вси, да изба́вимся от бед и скорбе́й: вас бо те́плыя предста́тели ко Спа́су стяжа́хом.

(Поклон)

Под Твое́ благоутро́бие прибега́ем, Богоро́дице, моле́ния на́ша не пре́зри во обстоя́нии; но от бед изба́ви ны, Еди́на Чи́стая, Еди́на Благослове́нная.

(Без поклона)

Чтец: Го́споди, поми́луй (40 раз).

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

И́менем Госпо́дним благослови́, о́тче.

Иере́й: Сый благослове́н Христо́с Бог наш, всегда́, ны́не и при́сно и во ве́ки веко́в.

Чтец: Аминь. Небе́сный Царю́, ве́ру утверди́, язы́ки укроти́, мир умири́, святы́й храм сей (святу́ю оби́тель сию́) до́бре сохрани́; пре́жде отше́дшия отцы́ и бра́тию на́шу в селе́ниих пра́ведных учини́, и нас в покая́нии и испове́дании приими́, я́ко благи́й и Человеколю́бец.

Иерей:

Го́споди и Влады́ко живота́ моего́, дух пра́здности, уны́ния, любонача́лия, и праздносло́вия не даждь ми.

(Поклон)

Дух же целому́дрия, смиреному́дрия, терпе́ния, и любве́, да́руй ми рабу́ Твоему́.

(Поклон)

Ей Го́споди Царю́, да́руй ми зре́ти моя́ прегреше́ния, и не осужда́ти бра́та моего́, я́ко благослове́н еси́ во ве́ки веко́в, ами́нь.

(Поклон)

Иере́й: Сла́ва Тебе́, Христе́ Бо́же, Упова́ние на́ше, сла́ва Тебе.

Хор: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Го́споди, поми́луй. (Трижды) Благослови́.

Иере́й: произносит отпуст.

Хор: Вели́каго Господи́на…

У́ТРЕНЯ

АЛЛИЛУ́ИА, ГЛАС 8:

Диа́кон: Аллилу́иа, Аллилу́иа, Аллилу́иа.

Стих 1: От но́щи у́тренюет дух мой к Тебе́, Бо́же, зане́ свет повеле́ния Твоя́ на земли́.

Хор, глас 8: Аллилу́иа, Аллилу́иа, Аллилу́иа.

(И да́лее на ка́ждый стих)

Стих 2: Пра́вде научи́теся живу́щии на земли́.

Стих 3: За́висть прии́мет лю́ди ненака́занныя.

Стих 4: Приложи́ им зла, Го́споди, приложи́ зла сла́вным земли́.

Хор:

Тро́ичны, глас 8:

На Не́бо сердца́ иму́ще, А́нгельский подражаи́м чин и со стра́хом Судии́ припаде́м, побе́дную взыва́юще хвалу́:

Хор: Свят, Свят, Свят еси́, Бо́же наш, Предста́тельствы Безпло́тных Твои́х поми́луй нас.

Чтец: Сла́ва Отцу́ и Сы́ну и Свято́му Ду́ху.

Зре́ти Тебе́ не сме́юще Херуви́ми, летя́ще, зову́т со восклица́нием Боже́ственную песнь трисвята́го гла́са, с ни́миже и мы вопие́м Ти:

Хор: Свят, Свят, Свят еси́, Бо́же наш, моли́твами всех святы́х Твои́х поми́луй нас.

Чтец: И ны́не и при́сно и во ве́ки веко́в. Ами́нь.

Сляца́еми мно́жеством прегреше́ний на́ших и не сме́юще воззре́ти на высоту́ Небе́сную, ду́шу с те́лом прекло́ньше, со А́нгелы песнь вопие́м Ти:

Хор: Свят, Свят, Свят еси́, Бо́же наш, Богоро́дицею поми́луй нас.

Читается 4-я, 5-я и 6-я кафизмы. Малых ектений нет.

СЕДА́ЛЬНЫ ПО КАФИ́ЗМАМ:

По 1-м стихосло́вии седа́льны умили́тельные Окто́иха, глас 8:

О́ком благоутро́бным, Го́споди, ви́ждь мое́ смире́ние, я́ко пома́ле жи́знь моя́ иждива́ется, и от дел несть мне спасе́ния. Сего́ ра́ди молю́ся: о́ком благоутро́бным, Го́споди, виждь мое́ смире́ние, и спаси́ мя.

Стих: Го́споди, да не я́ростию Твое́ю обличи́ши мене́, ниже́ гне́вом Твои́м нака́жеши мене́.

Я́ко Суди́й предстоя́щу, попецы́ся, душе́, и стра́шнаго дне час помышля́й: суд бо неми́лостив есть не сотво́ршим ми́лости. Возопи́й у́бо Христу́ Бо́гу: Сердцеве́дче, согреши́х, пре́жде да́же не осу́диши, поми́луй мя.

Сла́ва, и ны́не, Богоро́дичен:

Мы́сленная врата́ жи́зни, Пречи́стая Богоро́дице, притека́ющия Тебе́ ве́рно изба́ви от бе́д, да сла́вим пресвято́е рождество́ Твое́, во спасе́ние душ на́ших.

По 2-м стихосло́вии седа́лен Трио́ди, глас 3:

Красне́йшее вре́мя наста́, достохва́льный де́нь возсия́ воздержа́ния бра́тие, потщи́мся очи́ститися, я́ко да яви́мся чи́сти Сотво́ршему, и красоту́ Его́ получи́м, моли́твами Того́ роди́вшия, еди́ныя чи́стыя Богома́тере.

Сла́ва, то́йже седа́лен.

И ны́не, Богоро́дичен:

Красоте́ де́вства Твоего́, и пресве́тлой чистоте́ Твое́й Гаврии́л удиви́вся, вопия́ше Ти́ Богоро́дице: ку́ю Ти́ похвалу́ принесу́ досто́йную? что́ же возъимену́ю Тя́? недоумева́ю, и ужаса́юся. Те́мже я́ко повеле́н бы́х, вопию́ Ти: ра́дуйся Благода́тная.

По 3-м стихосло́вии седа́лен Трио́ди, глас 7:

Го́споди, да́вый на́м предвари́ти дне́шний де́нь, седми́цу святу́ю предсия́ющую све́тло, ла́зарево от ме́ртвых воста́ние стра́шное, сподо́би рабы́ Твоя́ стра́хом Твои́м преити́ по́прище поще́ния все́ соверша́ющыя.

Сла́ва, то́йже седа́лен.

И ны́не, Богоро́дичен:

Честне́йшая пресла́вных Херуви́мов еси́ Всечи́стая Де́во: они́ бо Боже́ственныя не терпя́ще си́лы, крила́ми покры́вше ли́ца, слу́жбу соверша́ют: Ты́ же воплоще́нна Сло́ва, самозри́тельно ви́дящи но́сиши: Его́же непреста́нно моли́ о душа́х на́ших.

По 50-м псалме́:

Диа́кон: Спаси́, Бо́же, лю́ди Твоя́ и благослови́ достоя́ние Твое́, посети́ мир Твой ми́лостию и щедро́тами, возвы́си рог христиа́н правосла́вных и низпосли́ на ны ми́лости Твоя́ бога́тыя: моли́твами Всепречи́стыя Владычицы на́шея Богоро́дицы и Присноде́вы Марии; си́лою Честна́го и Животворя́щаго Креста́; предста́тельствы честных небе́сных сил безпло́тных; честна́го сла́внаго Проро́ка Предте́чи и Крести́теля Иоа́нна; святых сла́вных и всехва́льных апо́стол; и́же во святы́х оте́ц на́ших и вселе́нских великих учи́телей и святи́телей Васи́лия Вели́каго, Григо́рия Богосло́ва и Иоа́нна Златоу́стаго; и́же во святы́х отца́ на́шего Никола́я, архиепи́скопа Мирлики́йскаго, чудотво́рца; святы́х равноапо́стольных Мефо́дия и Кирилла, учи́телей Слове́нских; святы́х равноапо́стольных вели́каго кня́зя Влади́мира и вели́кия княги́ни О́льги; и́же во святы́х оте́ц на́ших всея́ Росси́и чудотво́рцев Михаи́ла, Петра́, Алекси́я, Ио́ны, Фили́ппа, Ермоге́на, Инноке́нтия, Филарета, И́ова и Ти́хона; святы́х сла́вных и добропобе́дных му́чеников, преподо́бных и богоно́сных оте́ц на́ших, святы́х и праведных Богооте́ц Иоаки́ма и Анны (и святаго, егоже есть храм, и егоже есть день), и всех святы́х, мо́лим Тя, Многоми́лостиве Го́споди, услы́ши нас, гре́шных, моля́щихся Тебе́, и помилуй нас.

Хор: Го́споди, поми́луй. (12 раз.)

Иерей: Ми́лостию и щедро́тами, и человеколю́бием Единоро́днаго Твоего́ Сы́на, с Ни́мже благослове́н еси́ со Пресвяты́м и Благи́м и Животворя́щим Твои́м Ду́хом, ны́не и при́сно и во ве́ки веко́в.

Хор: Ами́нь.

КАНО́Н:

Расписан по уставу.

Песнь 1

Чтец: Го́сподеви пое́м, славно бо просла́вися, коня́ и всадника вве́рже в мо́ре.

Помо́щник и Покровитель бысть мне во спасе́ние, Сей мой Бог, и просла́влю Его, Бог отца́ моего́, и вознесу́ Его.

Госпо́дь сокруша́яй бра́ни, Госпо́дь и́мя Ему, колесни́цы фарао́новы, и си́лу его вве́рже в мо́ре.

Избра́нныя всадники триста́ты потопи́ в Чермне́м мо́ри.

Пучи́ною покры́ их, погрязо́ша во глубине́, я́ко ка́мень.

Десни́ца Твоя, Го́споди, просла́вися в кре́пости, десна́я Твоя рука́, Го́споди, сокруши́ враги́, и мно́жеством сла́вы Твоея́ стерл еси́ сопроти́вных.

Посла́л еси́ гнев Твой, пояде́ я́ я́ко сте́блие, и ду́хом я́рости Твоея́ разступи́ся вода́.

Огусте́ша, я́ко стена́, во́ды, огусте́ша и во́лны посреде́ мо́ря.

Кано́н минеи:

Ирмо́с, глас 4:

Триста́ты кре́пкия, Рожде́йся от Де́вы, безстра́стия во глубине́ души́ трича́стное потопи́, молю́ся, да Тебе́, я́ко в тимпа́не, во умерщвле́нии телесе́ побе́дное воспою́ пе́ние.

Чтец: Рече́ враг: гнав пости́гну, разделы́ коры́сть, испо́лню ду́шу мою́, убию́ мече́м моим, госпо́дствовати бу́дет рука́ моя́.

Му́чеников свяще́нных, свяще́нно страда́вших, свяще́нный и чу́дный наста́ пра́здник, светозаре́нием Ду́ха вся световодя́щи, соше́дшеся, празднолю́бцы, по до́лгу сих ублажи́м.

Чтец: Посла́л еси́ дух Твой, покры́ я́ мо́ре, погрязо́ша, я́ко о́лово, в воде́ зе́льней.

Му́чеников свяще́нных, свяще́нно страда́вших, свяще́нный и чу́дный наста́ пра́здник, светозаре́нием Ду́ха вся световодя́щи, соше́дшеся, празднолю́бцы, по до́лгу сих ублажи́м.

Чтец: Кто подо́бен Тебе́ в бозе́х, Го́споди, кто подо́бен Тебе́? Просла́влен во святы́х, дивен, сла́вно творя́й чудеса́.

Я́ко со́лнце све́тлое, доброде́телей светоно́сием возсия́л еси́ нам, Кодра́те страда́льче, светолу́чными твои́ми сия́нии тьму́ многобо́жия отгоня́, блаже́нне, и просвеща́я ве́рных составле́ния.

Чтец: Просте́рл еси́ десни́цу Твою, пожре́ я́ земля́. Наста́вил еси́ пра́вдою Твое́ю люди Твоя́ сия́, я́же изба́вил еси́.

Ка́мень жи́зни Иису́са Спа́са возвеща́юще Бо́га, пострада́сте тве́рдо, и исто́чник свяще́ния, ка́мень, прие́мшии, крове́й тече́ния соде́ласте, му́ченицы сла́внии.

Чтец: Уте́шил еси́ кре́постию Твое́ю во оби́тель святу́ю Твою. Слы́шаша язы́цы и прогне́вашася, боле́зни прия́ша живу́щии в Филисти́ме.

От тиме́ния страсте́й, помышле́ний треволне́ния, от стрел вра́жиих, от вся́каго прило́га сопроти́вна спаси́, Чи́стая Богороди́тельнице, ду́ши пою́щих Твое́ несказа́нное Рождество́, Всенепоро́чная.

1-й трипе́снец Трио́ди:

Чтец: Тогда́ потща́шася влады́ки Едо́мстии, и князе́й Моави́тских, прия́т я тре́пет, раста́яша вси живу́щии в Ханаа́не.

На́ша помышле́ния Боже́ственным ра́лом возде́лавше Боже́ственнаго поще́ния, доброде́телей кла́с плодопринесе́м, я́ко да не вза́лчем во ве́ки, наслажда́ющеся сла́достию неиждива́емою ра́дующеся.

Чтец: Нападе́т на ня страх и тре́пет, вели́чием мышцы Твоея́ да ока́менятся.

Многоле́тныя стра́сти вну́трь ношу́, омрача́ющыя окая́нную ду́шу мою́, к Твое́й безле́тне Сло́ве, безнача́льнаго Отца́ си́ле непобеди́мей, сокруше́нным се́рдцем припа́даю и молю́ся: уще́дри, и спаси́ мя.

Чтец: До́ндеже про́йдут лю́дие Твои́, Го́споди, до́ндеже про́йдут лю́дие Твои́ си́и, я́же стяжа́л еси́.

До́брое поще́ние пита́ет сердца́, умаща́ющее помышле́ния богоуго́дная, и страсте́й бе́здну изсуша́ющее, ту́чами умиле́ния очища́ет, ве́рою хвалу́ принося́щих Вседержи́телю.

Чтец: Введ, насади́ я́ в го́ру достоя́ния Твоего́, в гото́вое жили́ще Твое́, е́же соде́лал еси́, Го́споди, святы́ню, ю́же угото́васте ру́це Твои́.

Многоимени́тая Отрокови́це, ра́дуйся Свята́я Де́во, Богороди́тельнице Мари́е, ве́рных Похвало́, кля́твы Избавле́ние, Ле́ствице Небе́сная, Недомы́сленное Чу́до, Купино́ Неопали́мая, Земле́ Неде́ланная.

2-й трипе́снец Трио́ди:

Чтец: Госпо́дь, ца́рствуяй ве́ки, и на век, и еще́, егда́ вни́де конь фарао́нов с колесницами и вса́дники в мо́ре.

Живоно́сному дре́ву поклони́вшеся, отсю́ду и́дем путе́м поще́ния к стра́сти Христо́вой ра́дующеся.

Чтец: И наведе́ на ня Госпо́дь во́ду морску́ю, сы́нове же Изра́илевы проидо́ша су́шею посреде́ мо́ря.

Христу́ после́дующе, отве́ржемся ми́ра, и во́змем кре́ст на ра́мо, сообража́ющеся Его́ Боже́ственным страсте́м.

Чтец: Сла́ва Отцу́ и Сы́ну и Свято́му Ду́ху.

В Тре́х Ли́цех, Пресу́щное Еди́но Божество́, воспои́м вси́ Отца́, и Сы́на, и Свята́го Ду́ха.

Чтец: И ны́не и при́сно и во ве́ки веко́в. Ами́нь.

Его́же родила́ еси́ недомы́сленно, тле́ния не разуме́вши Чи́стая, Иису́са Спа́са уми́лостиви ны́не о рабе́х Твои́х.

Чтец: Сла́ва Тебе́, Бо́же наш, сла́ва Тебе́.

Егда́ в сла́ве прии́деши со А́нгелы, суди́ти вся́ческим, до́брый отве́т да́ти Тебе́ Христе́, на́с сподо́би.

Катава́сия, глас 7:

Пои́м Го́сподеви, погрузи́вшему всю си́лу фарао́нову в мо́ри, побе́дную песнь, я́ко просла́вися.

Песнь 3

Кано́н минеи:

Чтец: Госпо́дь взы́де на небеса́ и возгреме́, Той су́дит конце́м земли́, Пра́веден сый.

Тве́рдии адама́нти, убива́емии мече́м и боле́зней ви́дом приобща́ющеся терпели́вно, чу́дному Бо́гу на́шему взыва́ху: Свят еси́, Го́споди.

Чтец: И даст кре́пость царю на́шему, и вознесе́т рог христа́ Своего́.

Прему́дростию Кодра́т Богода́нною упраздни́ е́ллинскую му́дрость, любопре́ния стражда́, и свои́ми кровьми́, Ду́хом Боже́ственным удобря́яся.

Чтец: Сла́ва Отцу́ и Сы́ну и Свято́му Ду́ху.

С Кодра́том Ане́кта и с Па́влом Криске́нта, Киприа́на Боже́ственнаго и Диони́сия, ве́рнии, благочестному́дренно пе́сньми венча́ем, ве́рою пострада́вших.

Чтец: И ны́не и при́сно и во ве́ки веко́в. Ами́нь.

Ниже́ Небе́сный ум па́че ума́ Рождества́ Твоего́ мо́жет сказа́ти, Отрокови́це, Ума́ бо пе́рваго во утро́бе Сло́во, Чи́стая, зачала́ еси́, вся́ческая сло́вом соста́вльшаго.

Катава́сия, глас 4:

Я́ко непло́ды роди́ от язы́к Це́рковь, и мно́гое в ча́дех изнемо́же со́нмище, чу́дному Бо́гу на́шему возопии́м: Свят еси́, Го́споди.

ЕКТЕНИЯ́ МА́ЛАЯ.

Диакон: Па́ки и па́ки ми́ром Го́споду помо́лимся.

Хор: Го́споди, поми́луй.

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Хор: Го́споди, поми́луй.

Диакон: Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Хор: Тебе́, Го́споди.

Иере́й: Я́ко Ты еси́ Бог наш, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор: Ами́нь.

Чтец:

Седален мученика, глас 4:

Терпе́нием лю́тых умертви́л еси́ го́рдаго врага́, страстоте́рпче, ме́чную смерть претерпе́л еси́ вку́пе со стра́ждущими с тобо́ю всему́дрыми, Кодра́те. Те́мже пра́зднуем честну́ю ва́шу па́мять, вопию́ще: помяни́те нас ко Влады́це, непобеди́мии му́ченицы.

Сла́ва и ны́не, Богоро́дичен:

Нечи́стых помысло́в мои́х мно́жество и безме́стных мы́слей обурева́ния кто изрещи́ мо́жет, Всенепоро́чная? Настоя́ния же безпло́тных враг мои́х кто испове́сть и сих зло́бу? Но Твое́ю мольбо́ю, Блага́я, сих мне всех избавле́ние да́руй.

Песнь 4

Кано́н минеи:

Ирмо́с, глас 4:

Седя́й в сла́ве на престо́ле Божества́ во о́блаце ле́гце, прии́де Иису́с Пребоже́ственный Нетле́нною Дла́нию и спасе́ зову́щия: сла́ва, Христе́, си́ле Твое́й.

Чтец: Госпо́дь Бог мой, си́ла моя, и учини́т но́зе мои́ на соверше́ние.

Му́дростию твои́х слове́с нему́дрыя посрами́л еси́ и, наказа́нием богови́дных уче́ний твои́х, му́чениче Кодра́те, улови́в Боже́ственнаго Ане́кта, Влады́це твоему́ приво́диши терпели́ва му́ченика.

Чтец: И на высо́кая возво́дит мя, победи́ти ми в пе́сни Его́.

От пеле́н присво́ился еси́ вся Сотво́ршему, изде́тска соверше́нна му́жа смысл избра́в и прему́дрости возжеле́в, ве́сь был еси́ чисте́йшее, му́чениче, Христо́во оби́телище.

Чтец: Сла́ва Отцу́ и Сы́ну и Свято́му Ду́ху.

Шестосве́тлый све́щник му́чеников Твои́х, Го́споди, та́йным елее́м напои́вся, отгна́ многобо́жия но́щь и озари́ зову́щия: сла́ва, Христе́, си́ле Твое́й.

Чтец: И ны́не и при́сно и во ве́ки веко́в. Ами́нь.

Свята́я Богоро́дица, в Не́йже всели́тися благоволи́, я́ко благово́нен храм, Сло́во О́тчее единосу́щное, не опали́ ложе́сн, не боле́знова, и́бо роди́ Емману́ила, Бо́га и Челове́ка.

Песнь 5

Кано́н минеи:

Ирмо́с, глас 4:

Просвеще́ние Твое́, Го́споди, низпосли́ нам и от мглы прегреше́ний разреши́ ны, Бла́же, Твой мир да́руяй.

Чтец: Воскре́снут ме́ртвии, и воста́нут и́же во гробе́х, и возвеселя́тся и́же на земли́.

Просвеще́нием ра́зума неразу́мия мглу отгоня́, Го́сподеви приво́диши собо́р страда́лец, му́дре Кодра́те, с ни́ми венча́емь.

Чтец: Роса́ бо, я́же от Тебе́, исцеле́ние им есть, земля́ же нечести́вых паде́т.

По́стнически пе́рвее победи́в страсте́й привозста́ния, второ́е погуби́л еси́ держа́ву злочести́вых, Кодра́те му́чениче, пострада́в крепча́йше.

Чтец: Сла́ва Отцу́ и Сы́ну и Свято́му Ду́ху.

Исполня́ется невла́жный ка́мень пролия́ньми честны́х твои́х крове́й и струи́ све́тлы дае́т ве́рным, освяща́я Боже́ственными манове́ньми.

Чтец: И ны́не и при́сно и во ве́ки веко́в. Ами́нь.

Созда́вый, Пречи́стая, Е́ву от ребра́ из Твоея́ чи́стыя утро́бы зи́ждется, спасти́ Ада́ма за благоутро́бие восхоте́в, я́ко Человеколю́бец.

Песнь 6

Кано́н минеи:

Чтец: Храня́щии су́етная и ло́жная, ми́лость свою́ оста́виша.

Шесточи́сленный страстоте́рпец лик нам возсия́, я́коже зве́зды на церко́вней честне́й тве́рди, ве́рныя просвеща́яй и пре́лести тьму́ разгоня́яй.

Чтец: Аз же со гла́сом хвале́ния и испове́дания пожру́ Тебе́, ели́ка обеща́х, возда́м Тебе́ во спасе́ние мое́ Го́сподеви.

Пучи́ну мук преидо́сте, му́ченицы, нево́лненно и Вы́шнюю тишину́ получи́сте, ве́рных приста́нище бы́вше и моли́твенницы тепле́йшии.

Чтец: Сла́ва Отцу́ и Сы́ну и Свято́му Ду́ху.

Да похва́лим со Ане́ктом Кодра́та сла́внаго и с Па́влом Диони́сия, Криске́нта, Киприа́на, Христо́ва виногра́да добропло́дныя ро́зги.

Чтец: И ны́не и при́сно и во ве́ки веко́в. Ами́нь.

Онебеси́ла еси́ озе́мствованное естество́, Всенепоро́чная, челове́ков и истле́вшее сие́ новосоде́лала еси́, сего́ ра́ди, Отрокови́це, вси немо́лчными гла́сы Тя сла́вим.

Катава́сия, глас 4:

Возопи́, прообразу́я погребе́ние тридне́вное, проро́к Ио́на, в ки́те моля́ся: от тли изба́ви мя, Иису́се, Царю́ сил.

ЕКТЕНИЯ́ МА́ЛАЯ.

Диакон: Па́ки и па́ки, ми́ром Го́споду помо́лимся.

Хор: Го́споди, поми́луй.

Диакон: Заступи́, спаси́, поми́луй и сохрани́ нас, Бо́же, Твое́ю благода́тию.

Хор: Го́споди, поми́луй.

Диакон: Пресвяту́ю, пречи́стую, преблагослове́нную, сла́вную Влады́чицу на́шу Богоро́дицу и Присноде́ву Мари́ю со все́ми святы́ми помяну́вше, са́ми себе́ и друг дру́га, и весь живо́т наш Христу́ Бо́гу предади́м.

Хор: Тебе́, Го́споди.

Иере́й: Ты бо еси́ Ца́рь ми́ра и Спас душ на́ших, и Тебе́ сла́ву воссыла́ем, Отцу́ и Сы́ну и Свято́му Ду́ху, ны́не и при́сно и во ве́ки веко́в.

Хор: Ами́нь.

Чтец: Ди́вен Бог во святы́х Свои́х, Бог Изра́илев.

Свети́ла у́мная яви́стеся святи́и му́ченицы, мглу бо пре́лести упраздни́сте ве́рою, и душе́вныя свещи́ ва́ша просвети́сте, и с Женихо́м со сла́вою внидо́сте в небе́сный черто́г: и ны́не мо́лим вы, моли́теся спасти́ся душа́м на́шим.

Песнь 7

Кано́н минеи:

Ирмо́с, глас 4:

Спасы́й во огни́ авраа́мския Твоя́ о́троки и халде́и уби́в, я́же пра́вда пра́ведно уловля́ше, препе́тый Го́споди, Бо́же оте́ц на́ших, благослове́н еси́.

Чтец: Благослове́н еси́ на престоле сла́вы Ца́рствия Твоего́, препе́тый и превозноси́мый во ве́ки.

Во огни́ муче́ний свы́ше прие́млюще ро́су терпе́ния, со о́троки до́блии взыва́ху му́ченицы: препе́тый Го́споди, Бо́же оте́ц на́ших, благослове́н еси́.

Чтец: Благослове́н еси́ на тве́рди небе́сней, препе́тый и превозноси́мый во ве́ки.

Одожде́нием честны́я кро́ве ва́шея, страстоте́рпцы, ка́мень невла́жный пре́жде испо́лнися, струи́ пролива́ющ исцеле́ний пою́щим: Бо́же оте́ц, благослове́н еси́.

Чтец: Сла́ва Отцу́ и Сы́ну и Свято́му Ду́ху.

Я́ко мирополо́жница мы́сленная, ми́ро врачева́ний, Кодра́те, моще́й твои́х ра́ка источа́ет, страсте́й отгоня́щи злосмра́дие и опаля́ющи де́монов ополче́ния си́лою Боже́ственною.

Чтец: И ны́не и при́сно и во ве́ки веко́в. Ами́нь.

Благослове́н Плод благослове́нныя утро́бы Твоея́, Его́же благословя́т Небе́сныя си́лы и челове́честии собо́ри, нас изба́вльшаго от кля́твы дре́вния, Благослове́нная.

Песнь 8

Чтец: Благослови́те вся дела́ Госпо́дня, Го́спода, по́йте и превозноси́те Его во ве́ки.

Благослови́те А́нгели Госпо́дни, небеса́ Госпо́дня, Го́спода, по́йте и превозноси́те Его во ве́ки.

Благослови́те во́ды вся, я́же превыше небе́с, вся си́лы Госпо́дни, Го́спода, по́йте и превозносите Его во ве́ки.

Благослови́те со́лнце и ме́сяц, зве́зды небе́сныя, Го́спода, по́йте и превозносите Его во ве́ки.

Благослови́те всяк дождь и роса́, вси ду́си, Го́спода, по́йте и превозносите Его во ве́ки.

Благослови́те огнь и вар, студ и зной, Го́спода, по́йте и превозноси́те Его во ве́ки.

Кано́н минеи:

Ирмо́с, глас 4:

Изба́вителю всех, Всеси́льне, посреде́ пла́мене благоче́ствовавшия, снизше́д, ороси́л еси́ и научи́л еси́ пе́ти: вся дела́, благослови́те, по́йте Го́спода.

Чтец: Благослови́те ро́сы и иней, ле́ди и мраз, Го́спода, по́йте и превозноси́те Его во ве́ки.

Просве́щся страда́ний све́тлостию, венцено́сец Го́споду предстои́ши со страда́вшими с тобо́ю, сла́вне, воспева́я, Кодра́те: вся дела́, благослови́те, по́йте Го́спода.

Чтец: Благослови́те сла́ны и сне́зи, но́щи и дни́е, Го́спода, по́йте и превозноси́те Его во ве́ки.

Просве́щся страда́ний све́тлостию, венцено́сец Го́споду предстои́ши со страда́вшими с тобо́ю, сла́вне, воспева́я, Кодра́те: вся дела́, благослови́те, по́йте Го́спода.

Чтец: Благослови́те свет и тьма, мо́лния и о́блацы, Го́спода, по́йте и превозноси́те Его во ве́ки.

Доброде́телей све́том удобря́емь, при кончи́не му́ченическую све́тлость насле́довал еси́, всему́дре, воспева́я, Кодра́те: вся дела́, благослови́те, по́йте Го́спода.

Чтец: Благослови́те земля́, го́ры и хо́лми и вся, прозяба́ющая на ней, Го́спода, по́йте и превозноси́те Его во ве́ки.

Предогражде́ния Кори́нф стяжа́, святы́х честны́я мо́щи, и врачева́ние безме́здно храм, иде́же ве́рою всяк притека́яй боле́зней и страсте́й изменя́ется.

Чтец: Благослови́те исто́чницы, моря́ и ре́ки, ки́ти и вся, дви́жущаяся в вода́х, Го́спода, по́йте и превозноси́те Его во ве́ки.

Изба́вльшеся кля́твы прама́терния Тобо́ю, Чи́стая Богома́ти, благослове́нная Влады́чице, благослови́м Тя ве́рою и песносло́вим, Пресвята́я Де́во Богоневе́сто.

1-й трипе́снец Трио́ди:

Чтец: Благослови́те вся пти́цы небе́сныя, зве́рие и вси ско́ти, Го́спода, по́йте и превозноси́те Его во ве́ки.

Вре́дными зми́я пре́лестьми извлачи́мь, и прельща́емь умо́м по вся́ дни́, я́зве мое́й прилага́я я́зву, Спа́се зову́ Ти: Врачу́ боля́щих, обрати́ и спаси́ мя.

Чтец: Благослови́те сы́нове челове́честии, да благослови́т Израиль, Го́спода, по́йте и превозносите Его во ве́ки.

Пости́вся воскреси́ отроча́ Сомани́тиды дре́вле, укрепля́емь Елиссе́й я́ве ду́хом: мы́ же умертви́вшеся сладостра́стием, живоно́сным посто́м ве́рнии оживи́мся.

Чтец: Благослови́те свяще́нницы Господни, раби́ Госпо́дни, Го́спода, по́йте и превозноси́те Его во ве́ки.

Ниневи́тяны спа́сл еси́ Го́споди Человеколю́бче, дре́вле пока́явшыяся, в пла́чи и посте́, я́ко благоутро́бен: на́с же ми́лостию Твое́ю уще́дри, недоуме́ющих де́лы испове́датися Тебе́.

Чтец: Благослови́те ду́си и ду́ши пра́ведных, преподо́бнии и смире́ннии се́рдцем, Го́спода, по́йте и превозноси́те Его во ве́ки.

По Рождестве́ нетле́нно Пребы́вшая Всенепоро́чная, изба́ви, мо́лимся Чи́стая, от тли́ рабы́ Твоя́, ве́рно пою́щыя единомышле́нием души́: благослови́те дела́ Госпо́дня Го́спода.

2-й трипе́снец Трио́ди:

Чтец: Благослови́те Ана́ния, Аза́рия, Мисаи́л, Го́спода, по́йте и превозноси́те Его во ве́ки.

Воздержа́ния с Бо́гом кре́пость иму́ще ве́рнии, про́чее ю́ношески теце́м свято́е по́прище, и венцы́ прии́мем.

Чтец: Благослови́те апо́столи, проро́цы и му́ченицы Господни, Го́спода, по́йте и превозноси́те Его во ве́ки.

Безпло́дие зря́ многоболе́зненныя моея́ души́, еще́ потерпи́ Христе́, и не посецы́ мене́, я́коже смоко́вницу о́ную прокля́тую.

Чтец: Благослови́м Отца́ и Сы́на и Свята́го Духа, Го́спода.

Единонача́льная Тро́ице, и Триипоста́сная Еди́нице, О́тче, Сы́не и Ду́ше, от вся́ких изба́ви искуше́ний и бе́д Тя́ воспева́ющыя.

Чтец: И ны́не и при́сно и во ве́ки веко́в. Ами́нь.

Ра́дуйся, Горо́ Бо́жия: ра́дуйся, Присносве́тлая Свеще́: ра́дуйся, Но́вое Не́бо: ра́дуйся, У́ме Блиста́яйся: ра́дуйся, Хра́ме Госпо́день: ра́дуйся Всепе́тая.

Чтец: Сла́ва Тебе́, Бо́же наш, сла́ва Тебе́.

Стра́шное Твое́ испыта́ние помышля́я Христе́, ужаса́юся, трепе́щу, и вопию́: неизме́рную име́яй ве́лию ми́лость, спаси́ мя окая́ннаго.

Хор: Хва́лим, благослови́м, покланя́емся Го́сподеви, пою́ще, и превознося́ще во вся ве́ки.

Катава́сия, глас 7:

Стра́шнаго Херуви́мом, и чу́днаго Серафи́мом, и ми́ру Творца́, свяще́нницы, и раби́, и ду́си пра́ведных, по́йте, благослови́те и превозноси́те Его́ во ве́ки.

Диа́кон: Богоро́дицу и Ма́терь Све́та в пе́снех возвели́чим.

Хор: Вели́чит душа́ Моя́ Го́спода, и возра́довася дух Мой о Бо́зе Спа́се Мое́м.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Я́ко призре́ на смире́ние рабы́ Своея́, се бо от ны́не ублажа́т Мя вси ро́ди.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Я́ко сотвори́ Мне вели́чие Си́льный, и свя́то И́мя Его́, и ми́лость Его́ в ро́ды родо́в боя́щимся Его́.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Сотвори́ держа́ву мы́шцею Свое́ю, расточи́ го́рдыя мы́слию се́рдца их.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Низложи́ си́льныя со престо́л, и вознесе́ смире́нныя; а́лчущия испо́лни благ, и богатя́щияся отпусти́ тщи.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Восприя́т Изра́иля о́трока Своего́, помяну́ти ми́лости, я́коже глаго́ла ко отце́м на́шим, Авраа́му и се́мени его́, да́же до ве́ка.

Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Песнь 9

Кано́н минеи:

Ирмо́с, глас 4:

Е́ва у́бо неду́гом преслуша́ния кля́тву всели́ла е́сть; Ты же, Де́во Богоро́дице, прозябе́нием чревоноше́ния ми́рови благослове́ние процвела́ еси́. Тем Тя вси велича́ем.

Чтец: Благослове́н Госпо́дь Бог Изра́илев, я́ко посети́ и сотвори́ избавле́ние лю́дем Своим

Гное́ния ва́ша му́ченическая испуща́ют благово́ние, по́лно благода́ти, кро́ви сих целе́б излива́ют то́ки Боже́ственным Ду́хом и стра́сти душетле́нныя исцеля́ют, я́же досто́йно ублажи́м.

Чтец: И воздви́же рог спасе́ния нам, в дому́ Дави́дове о́трока Своего́.

Красе́н язв добро́тами быв, А́нгелом уподо́бился еси́, кро́вию же излия́нною, Кодра́те, всед, я́ко на колесни́цу, возлете́л еси́ к Вы́шним Ца́рством, по́чести боле́зней прие́мля.

Чтец: Я́коже глаго́ла усты́ святы́х, су́щих от ве́ка проро́к Его́.

Источа́я Боже́ственную сла́дость из уст, страда́льческий собо́р увеща́л еси́, му́чениче Кодра́те, страда́ти с тобо́ю, Ане́кта, и Па́вла, и Криске́нта, Киприа́на же и Боже́ственнаго Дионисия, с ни́миже лику́еши, досточу́дне.

Чтец: Спа́сение от враг на́ших и из руки́ всех ненави́дящих нас.

Де́нь пра́здника ва́шего страда́ния, страстоте́рпцы, вси почита́ем, в сей бо, вене́ц нетле́ния взе́мше, сы́нове бы́сте све́та же и дне, лику́юще о́крест престо́ла Всецаря́.

Чтец: Сотвори́ти ми́лость со отцы́ на́шими и помяну́ти заве́т святы́й Свой.

Я́вльшися всех Творца́ Роди́тельница па́че вся́каго ума́, Всенепоро́чная, Небе́с вы́шши показа́лася еси́ и все́ми влады́чествующи, Де́во Богороди́тельнице нескве́рная, тем Тя вси непреста́нно велича́ем.

1-й трипе́снец Трио́ди:

Чтец: Кля́тву, е́юже кля́тся ко Авраа́му, отцу́ на́шему, да́ти нам без стра́ха, из руки́ враг на́ших изба́вльшимся.

Ча́шу Боже́ственную испо́лнивши ны́не умиле́ния, по́стная благода́ть я́ве, созыва́ет вся́ ве́рныя, вопию́щи с весе́лием: прииди́те, наслади́теся, пия́нство страсте́й отложи́вше, да бу́дущаго сподо́битеся утеше́ния.

Чтец: Служи́ти Ему́ преподо́бием и пра́вдою пред Ним вся дни живота́ на́шего.

Бли́з Су́д, внемли́ душе́, со́вестию попецы́ся, и де́лай до́бре, тебе́ неосужде́ну при́сно соблюда́ющая: а́ще бо себе́ зде́ разсужда́ем, ника́коже та́мо осу́димся без свиде́телей, иде́же пови́ннии осужда́ются.

Чтец: И ты, отроча́, проро́к Вы́шняго нарече́шися, преды́деши бо пред лице́м Госпо́дним угото́вати пути́ Его́.

Нача́ла, Си́лы, Престо́ли, Серафи́ми, Госпо́дьства, и Вла́сти, и Херуви́ми, А́нгели, Арха́нгели, Бо́га моли́те, поще́ния вре́мя прейти́ на́м, сему́ уго́дная творя́щым, да я́ко раби́ благоугоди́вшии сла́ву получи́м.

Чтец: Да́ти ра́зум спасе́ния лю́дем Его́, во оставле́ние грех их, милосе́рдия ра́ди ми́лости Бо́га на́шего.

С му́ченики, с проро́ки, ро́ждшую Тя́, с преподо́бными все́ми Христе́ моля́щуюся приими́ при́сно, о рабе́х прогне́вавших Тя́, Еди́наго Человеколю́бца Влады́ку, Его́же небе́снии чи́нове трепе́щут.

2-й трипе́снец Трио́ди:

Чтец: В ни́хже посети́ нас Восто́к с высоты́, яви́тися во тьме и се́ни сме́ртней седя́щим.

Ти́хое пла́вание поще́ния, духо́вным дыха́нием преплы́вше, ко приста́нищу страсте́й Христо́вых, дости́гнути помо́лимся.

Чтец: Напра́вити но́ги на́ша на путь ми́рен.

Ханане́и поревнова́в, поми́луй мя́ вопию́ Ти, Сы́не Дави́дов Бо́же, и исцели́ мою́ изнемо́гшую ду́шу, я́коже о́ныя дще́рь.

Чтец: Сла́ва Отцу́ и Сы́ну и Свято́му Ду́ху.

Божества́ Естество́, Еди́нствующее Еди́ницу, и начерта́ньми Треми́ Тро́йствующее, Отца́, и Сы́на, и Ду́ха воспои́м.

Чтец: И ны́не и при́сно и во ве́ки веко́в. Ами́нь.

Во Чре́ве заче́ншая непостижи́маго Сло́ва, и Сего́ без се́мене пло́ти ро́ждшая, моли́ приле́жно спасти́ся душа́м на́шым.

Чтец: Сла́ва Тебе́, Бо́же наш, сла́ва Тебе́.

Оправда́вый мытаря́, очи́сти мя́ вопию́ща: и мне́ гре́шному ми́лостив бу́ди, все́х Судие́, проща́я моя́ согреше́ния.

Катава́сия, глас 7:

Па́че естества́ Ма́терь и по естеству́ Де́ву, Еди́ну в жена́х Благослове́нную, пе́сньми, ве́рнии, Богоро́дицу велича́ем.

Хор: Досто́йно есть… (Поклон)

СВЕТИ́ЛЬНЫ ПО КАНО́НУ:

Свети́льны, глас 8:

Чтец: Све́т сы́й Христе́, просвети́ мя Тобо́ю:

Хор: Предста́тельствы Безпло́тных Твои́х, и спаси́ мя.

Чтец: Сла́ва Отцу́ и Сы́ну и Свято́му Ду́ху. Све́т сы́й Христе́, просвети́ мя Тобо́ю:

Хор: Моли́твами, Го́споди, святы́х Твои́х, и спаси́ мя.

Чтец: И ны́не и при́сно и во ве́ки веко́в. Ами́нь. Све́т сы́й Христе́, просвети́ мя Тобо́ю:

Хор: Моли́твами, Го́споди, Богоро́дицы, и спаси́ мя.

СТИХИ́РЫ НА СТИХО́ВНЕ, ГЛАС 8:

Канона́рх: Глас осьмы́й, Впа́дшему в разбо́йники уподо́бихся а́з.

Стихи́ры Триоди, глас 8:

Впа́дшему в разбо́йники уподо́бихся а́з, Влады́ко все́х прегреше́ньми мои́ми упа́д, и от ни́х неми́лостивно уязви́хся: но не оста́ви мене́ неисце́льна, не от самари́и, но от пречи́стыя Де́вы прише́дый, Иису́се спаси́тельное и́мя, поми́луй мя́.

Сти́х: Испо́лнихомся зау́тра ми́лости Твоея́ Го́споди, и возра́довахомся и возвесели́хомся, во вся́ дни́ на́шя возвесели́хомся, за дни́, в ня́же смири́л ны́ еси́, ле́та, в ня́же ви́дехом зла́я: и при́зри на рабы́ Твоя́, и на дела́ Твоя́, и наста́ви сы́ны и́х.

Та же стихи́ра.

Сти́х: И бу́ди све́тлость Го́спода Бо́га на́шего на на́с, и дела́ ру́к на́ших испра́ви на на́с, и де́ло ру́к на́ших испра́ви.

Что́ вы́ нарече́м святи́и? Херуви́мы ли? я́ко на ва́с почи́л е́сть Христо́с. Серафи́мы ли? я́ко непреста́нно просла́висте Его́? А́нгелы ли? те́ла бо отврати́стеся. Си́лы ли? де́йствуете бо чудесы́. Мно́гая ва́ша имена́, и бо́льшая дарова́ния: моли́те спасти́ся душа́м на́шым.

Сла́ва и ны́не, Богоро́дичен, глас то́йже:

Небе́сная пою́т Тя́, обра́дованная Ма́ти Безневе́стная, и мы́ славосло́вим неизсле́дованное Твое́ Рождество́ Богоро́дице, моли́ спасти́ся душа́м на́шым.

НА ЧАСА́Х:

На 1-м часе – кафизмы нет; на 3-м часе – кафизма 7-я; на 6-м часе – кафизма 8-я; на 9-м часе – кафизма 9-я.

ЧТЕ́НИЯ НА 6-М ЧА́СЕ:

Чтец: Тропарь пророчества, глас 3: Я́ко беззако́ния на́ша воста́ша на ны́, воскресни́ Го́споди помози́ на́м: ты́ бо еси́ Оте́ц на́ш, кроме́ бо тебе́ ино́го не зна́ем.

(Последние слова в некоторых храмах поются хором, а чтец читает до знака )

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Я́ко беззако́ния на́ша воста́ша на ны́, воскресни́ Го́споди помози́ на́м: ты́ бо еси́ Оте́ц на́ш, кроме́ бо тебе́ ино́го не зна́ем.

Иере́й: Во́нмем.

Чтец: Проки́мен, гла́с 4: Олтари́ твоя́ Го́споди Си́л, Царю́ мо́й, и Бо́же мо́й.

Хор: Олтари́ твоя́ Го́споди Си́л, Царю́ мо́й, и Бо́же мо́й.

Чтец, стих: Ко́ль возлю́бленна селе́ния Твоя́ Го́споди Си́л.

Хор: Олтари́ твоя́ Го́споди Си́л, Царю́ мо́й, и Бо́же мо́й.

Чтец: Олтари́ твоя́ Го́споди Си́л.

Хор: Царю́ мо́й, и Бо́же мо́й.

Иерей: Прему́дрость.

Чтец: Проро́чества Иса́иина чте́ние

Иерей: Во́нмем.

Чтец: Та́ко глаго́лет Госпо́дь на царя́ ассири́йска: не вни́дет в се́й гра́д, ниже́ пу́стит на́нь стрелу́, ниже́ возложи́т на́нь щита́, ниже́ огради́т о́крест его́ огражде́ния: Но путе́м, и́мже прии́де, те́мже возврати́тся, и в гра́д се́й не вни́дет. сия́ глаго́лет Госпо́дь: Защищу́ гра́д се́й, е́же спасти́ его́ мене́ ра́ди, и ра́ди Дави́да раба́ Моего́. И изы́де А́нгел Госпо́день, и изби́ от полка́ ассири́йска сто́ о́смьдесят пя́ть ты́сящ: и воста́вше зау́тра, обрето́ша вся́ телеса́ ме́ртва. И оти́де возвра́щься сеннахири́м ца́рь ассири́йский, и всели́ся в Ниневи́и: И внегда́ покланя́тися ему́ в дому́ Насара́ху отечествонача́льнику своему́, Адрамеле́х и Сараса́р сы́нове его́ уби́ша его́ мечми́, са́ми же убежа́ша во Арме́нию, и воцари́ся Асорда́н сы́н его́ вме́сто его́. Бы́сть же в то́ вре́мя, разболе́ся Езеки́а до сме́рти, и прии́де к нему́ Иса́иа проро́к сы́н Амо́сов, и рече́ к нему́: сия́ глаго́лет Госпо́дь, устро́й о дому́ твое́м, умира́еши бо ты́, и не бу́деши жи́в. И обрати́ Езеки́а лице́ свое́ к стене́, и помоли́ся к Го́сподеви, глаго́ля: Помяни́ Го́споди, ка́ко ходи́х пред Тобо́ю со и́стиною, и се́рдцем и́стинным, и уго́дная пред тобо́ю сотвори́х, и пла́кася Езеки́а пла́чем вели́ким. И бы́сть сло́во Госпо́дне ко Иса́ии глаго́ля: Иди́, и рцы́ Езеки́и: та́ко глаго́лет Госпо́дь Бог Дави́да отца́ твоего́: услы́шах моли́тву твою́, и ви́дех сле́зы твоя́, се́ прилага́ю к ле́том твои́м, ле́т пятьна́десять. И от руки́ царя́ ассири́йска изба́влю тя́, и гра́д се́й, и защищу́ о гра́де се́м.

Иерей: Во́нмем.

Чтец: Проки́мен, гла́с 8: Яви́ на́м Го́споди ми́лость Твою́, и спасе́ние Твое́ да́ждь на́м.

Хор: Яви́ на́м Го́споди ми́лость Твою́, и спасе́ние Твое́ да́ждь на́м.

Чтец, стих: Благоволи́л еси́ Го́споди зе́млю Твою́, возврати́л еси́ пле́н Иа́ковль.

Хор: Яви́ на́м Го́споди ми́лость Твою́, и спасе́ние Твое́ да́ждь на́м.

Чтец: Яви́ на́м Го́споди ми́лость Твою́.

Хор: И спасе́ние Твое́ да́ждь на́м.

КОНДАКИ́ НА ИЗОБРАЗИ́ТЕЛЬНЫХ:

КОНДАКИ́ В ХРА́МЕ ГОСПО́ДСКОМ:

КОНДА́К ХРА́МА

Конда́к дня – А́нгелам, глас 2:

Архистрати́зи Бо́жии, служи́телие Боже́ственныя сла́вы, Ангелов начальницы, и челове́ков наста́вницы, поле́зное нам проси́те, и ве́лию ми́лость, я́ко безпло́тных Архистрати́зи.

Сла́ва, конда́к за уме́рших, глас 8:

Со святы́ми упоко́й, Христе́, ду́ши раб Твоих, иде́же несть боле́знь, ни печа́ль, ни воздыха́ние, но жизнь безконе́чная.

И ны́не, конда́к Богоро́дицы глас 6:

Предста́тельство христиа́н непосты́дное, хода́тайство ко Творцу́ непрело́жное, не пре́зри гре́шных моле́ний гла́сы, но предвари́, я́ко Блага́я, на по́мощь нас, ве́рно зову́щих Ти; ускори́ на моли́тву и потщи́ся на умоле́ние, предста́тельствующи при́сно, Богоро́дице, чту́щих Тя.

КОНДАКИ́ В ХРА́МЕ БОГОРО́ДИЦЫ:

Конда́к дня – А́нгелам, глас 2:

Архистрати́зи Бо́жии, служи́телие Боже́ственныя сла́вы, Ангелов начальницы, и челове́ков наста́вницы, поле́зное нам проси́те, и ве́лию ми́лость, я́ко безпло́тных Архистрати́зи.

Сла́ва, конда́к за уме́рших, глас 8:

Со святы́ми упоко́й, Христе́, ду́ши раб Твоих, иде́же несть боле́знь, ни печа́ль, ни воздыха́ние, но жизнь безконе́чная.

И ны́не:

КОНДА́К ХРА́МА

КОНДАКИ́ В ХРА́МЕ СВЯТО́ГО:

Конда́к дня – А́нгелам, глас 2:

Архистрати́зи Бо́жии, служи́телие Боже́ственныя сла́вы, Ангелов начальницы, и челове́ков наста́вницы, поле́зное нам проси́те, и ве́лию ми́лость, я́ко безпло́тных Архистрати́зи.

КОНДА́К ХРА́МА

Сла́ва, конда́к за уме́рших, глас 8:

Со святы́ми упоко́й, Христе́, ду́ши раб Твоих, иде́же несть боле́знь, ни печа́ль, ни воздыха́ние, но жизнь безконе́чная.

И ны́не, конда́к Богоро́дицы, глас 6:

Предста́тельство христиа́н непосты́дное, хода́тайство ко Творцу́ непрело́жное, не пре́зри гре́шных моле́ний гла́сы, но предвари́, я́ко Блага́я, на по́мощь нас, ве́рно зову́щих Ти; ускори́ на моли́тву и потщи́ся на умоле́ние, предста́тельствующи при́сно, Богоро́дице, чту́щих Тя.

ВСЕДНЕ́ВНАЯ ВЕЧЕ́РНЯ

Читается 10-я кафи́зма.

СТИХИ́РЫ НА ГО́СПОДИ ВОЗЗВА́Х, ГЛАС 3:

Канона́рх: Глас тре́тий, Го́споди, воззва́х к Тебе́, услы́ши мя.

Хор: Го́споди, воззва́х к Тебе́, услы́ши мя. Услы́ши мя, Го́споди. Го́споди, воззва́х к Тебе́, услы́ши мя: вонми́ гла́су моле́ния моего́, внегда́ воззва́ти ми к Тебе́. Услы́ши мя, Го́споди.

Да испра́вится моли́тва моя́, я́ко кади́ло пред Тобо́ю, воздея́ние руку́ мое́ю – же́ртва вече́рняя. Услы́ши мя, Го́споди.

Чтец: Положи́, Го́споди, хране́ние усто́м мои́м, и дверь огражде́ния о устна́х мои́х. Не уклони́ се́рдце мое́ в словеса́ лука́вствия, непщева́ти вины́ о гресе́х, с челове́ки де́лающими беззако́ние, и не сочту́ся со избра́нными их. Нака́жет мя пра́ведник ми́лостию и обличи́т мя, еле́й же гре́шнаго да не нама́стит главы́ моея́,я́ко еще́ и моли́тва моя́ во благоволе́ниих их. Поже́рты бы́ша при ка́мени судии́ их: услы́шатся глаго́ли мои́, я́ко возмого́ша. Я́ко то́лща земли́ просе́деся на земли́, расточи́шася ко́сти их при а́де. Я́ко к Тебе́, Го́споди, Го́споди, о́чи мои́: на Тя упова́х, не отыми́ ду́шу мою́. Сохрани́ мя от се́ти, ю́же соста́виша ми, и от собла́зн де́лающих беззако́ние. Паду́т во мре́жу свою́ гре́шницы: еди́н есмь аз, до́ндеже прейду́. Гла́сом мои́м ко Го́споду воззва́х, гла́сом мои́м ко Го́споду помоли́хся. Пролию́ пред Ним моле́ние мое́, печа́ль мою́ пред Ним возвещу́. Внегда́ исчеза́ти от мене́ ду́ху моему́: и Ты позна́л еси́ стези́ моя́: на пути́ сем, по нему́же хожда́х, скры́ша сеть мне. Смотря́х одесну́ю и возгля́дах, и не бе зна́яй мене́: поги́бе бе́гство от мене́, и несть взыска́яй ду́шу мою́. Воззва́х к Тебе́, Го́споди, рех: Ты еси́ упова́ние мое́, часть моя́ еси́ на земли́ живы́х. Вонми́ моле́нию моему́, я́ко смири́хся зело́, изба́ви мя от гоня́щих мя, я́ко укрепи́шася па́че мене́. Изведи́ из темни́цы ду́шу мою́, испове́датися и́мени Твоему́. Мене́ ждут пра́ведницы, до́ндеже возда́си мне. Из глубины́ воззва́х к Тебе́, Го́споди, Го́споди, услы́ши глас мой. Да бу́дут у́ши Твои́ вне́млюще гла́су моле́ния моего́.

Стихи́ры Трио́ди, глас 3:

На 6. Стих: Аще беззако́ния на́зриши, Го́споди, Го́споди, кто постои́т? Яко у Тебе́ очище́ние е́сть.

Да́вый на́м поще́ния вре́мя обрати́тися и живы́м бы́ти, и ника́коже поги́бнути, Сло́ве Бо́жий, сподо́би все́х благоугоди́ти Тебе́ до́бре, и те́плым умиле́нием послужи́ти Тебе́ Христе́, я́коже блудни́ца о́ная целому́дренная и честна́я, иногда́ ми́ром и излия́ньми те́плых сле́з, прегреше́ний прии́мши оставле́ние.

Стих: Имене ра́ди Твоего́ потерпе́х Тя, Го́споди, потерпе́ душа́ моя́ в сло́во Твое́, упова́ душа́ моя́ на Го́спода.

Я́коже слепы́й от се́рдца зову́ Ти: Сы́не Бо́жий, просвети́ мои́ о́чи серде́чныя. Я́коже ве́рная ханане́а вопию́ Ти: поми́луй мя́ Ще́дре, и́бо ду́шу бесну́ющуюся и́мам в сласте́х: ю́же премени́в от тьмы́ страсте́й, про́чее жи́ти чи́сте сотвори́, да сла́влю Твою́ мно́гую благосты́ню.

Стихи́ра Трио́ди, глас 8:

На 4. Стих: От стра́жи у́тренния до но́щи, от стра́жи у́тренния, да уповае́т Изра́иль на Го́спода.

Богосве́тлая благода́ть воздержа́ния, возсия́вши на́м дне́сь со́лнца светле́е, ду́шы на́шя просвеща́ет, я́коже о́блаки стра́сти грехо́вныя отгоня́ющи. Сего́ ра́ди вси́ притеце́м, благоду́шно сию́ лобыза́юще: ра́дующеся соверша́ем боже́ственное по́прище того́, его́же в весе́лиих учрежда́ющеся возопии́м Христу́: освяти́ бла́же, сие́ соверша́ющыя ве́рно.

Стихи́ры свт. Софрония, глас 4:

Стих: Яко у Го́спода ми́лость, и мно́гое у Него́ избавле́ние,
и Той изба́вит Изра́иля от всех беззако́ний eго.

Целому́дрия тезоимени́т, от Боже́ственнаго проразуме́ния про́зван быв, Софро́ние, целому́др был еси́ в де́лех и пра́веден, му́жествен и разу́мен, доброде́тельми ро́дными до́бле венча́емь, и пребы́л еси́, процвета́я во обои́х, душе́ю же и те́лом я́коже строи́тель изря́днейший.

На 2. Стих: Хвали́те Го́спода вси язы́цы, похвали́те Его́ вси лю́дие.

Из уст Богослове́сных богосло́вна возгреме́л еси́ уче́ния, Софро́ние всеблаже́нне, богосло́вив ясне́йше Отца́ Безнача́льна, и Собезнача́льна Сы́на, и Ду́ха Свята́го Соприсносу́щна, во Еди́нице Тро́ицу и Еди́ницу в Тро́ице, Бо́га Еди́наго суще́ственным то́ждеством.

Стих: Яко утверди́ся ми́лость Его́ на нас, и и́стина Госпо́дня пребыва́ет во век.

Пло́ти по ипоста́си соеди́ншася безпло́тнаго и Отцу́ Собезнача́льнаго Сло́ва, всему́дре, кроме́ преложе́ния и слия́ния, му́дре научи́л еси́, де́йствующа же сугу́бо обои́ми естествы́, из ни́хже слежи́т и в ни́хже зри́тся, Еди́н Сый, неразде́лен Существо́м, в сем и о́ном разумева́емый.

Сла́ва и ны́не, Богоро́дичен, глас то́йже:

Ту́чами Ду́ха Пресвята́го, Пречи́стая, мою́ мы́сль ороси́, я́же ка́плю ро́ждшая – Христа́, неизче́тно безме́рная беззако́ния челове́ков щедро́тами измы́вшую, изсуши́ исто́чник страсте́й мои́х и пото́ка мя сподо́би пи́щи живы́я при́сно моли́твами Твои́ми.

ВХО́ДА НЕТ:

ПРОКИ́МНЫ И ЧТЕ́НИЯ ВЕЧЕ́РНИ:

Чтец: Проки́мен, глас 4: Наста́ви мя́ Го́споди на пу́ть Тво́й, и пойду́ во и́стине Твое́й.

Хор: Наста́ви мя́ Го́споди на пу́ть Тво́й, и пойду́ во и́стине Твое́й.

Чтец: Приклони́ Го́споди у́хо твое́.

Хор: Наста́ви мя́ Го́споди на пу́ть Тво́й, и пойду́ во и́стине Твое́й.

Чтец: Наста́ви мя́ Го́споди на пу́ть Тво́й.

Хор: И пойду́ во и́стине Твое́й к.

Диа́кон: Прему́дрость.

Чтец: Бытия́ чте́ние.

Диа́кон: Во́нмем.

Чтец: Авра́м же всели́ся в земли́ Ханаа́нстей: Ло́т же всели́ся во гра́де окре́стных стра́н, и всели́ся в Содо́ме. Челове́цы же су́щии в Содо́ме зли́, и гре́шни пред Бо́гом зело́. Бог же рече́ Авра́му, повнегда́ разлучи́тися Ло́ту от него́: воззри́ очи́ма твои́ма, и ви́ждь от ме́ста, иде́же ты́ ны́не еси́, к се́веру, и ли́ве1, и к восто́ку, и мо́рю. Я́ко всю́ зе́млю, ю́же ты́ ви́диши, тебе́ да́м ю́, и се́мени твоему́ во ве́ки. И сотворю́ се́мя твое́ я́ко песо́к земны́й: а́ще кто́ мо́жет исчести́ песо́к земны́й, то и се́мя твое́ изочте́т. Воста́в пройди́ зе́млю в долготу́ ея́, и в широту́, я́ко тебе́ да́м ю́, и се́мени твоему́ во ве́к. И отсели́вся Авра́м, прише́д всели́ся у ду́ба Мамври́йскаго, и́же бя́ше в Хевро́не: и созда́ ту́ же́ртвенник Го́споду.

Диа́кон: Во́нмем.

Чтец: Проки́мен, глас 4: Лю́бит Госпо́дь врата́ Сио́ня, па́че все́х селе́ний Иа́ковлих.

Хор: Лю́бит Госпо́дь врата́ Сио́ня, па́че все́х селе́ний Иа́ковлих.

Чтец: Основа́ния его́ на гора́х святы́х.

Хор: Лю́бит Госпо́дь врата́ Сио́ня, па́че все́х селе́ний Иа́ковлих.

Чтец: Лю́бит Госпо́дь врата́ Сио́ня.

Хор: Па́че все́х селе́ний Иа́ковлих. 

Диа́кон: Прему́дрость.

Чтец: При́тчей чте́ние.

Диа́кон: Во́нмем.

Чтец: Стра́х Госпо́день исто́чник жи́зни, твори́т же уклоня́тися от се́ти сме́ртныя. Во мно́зе язы́це сла́ва царю́: во оскуде́нии же лю́дсте сокруше́ние си́льному. Долготерпели́в му́ж, мно́г в ра́зуме: малоду́шный же кре́пко безу́мен. Кро́ткий му́ж се́рдцу вра́чь: мо́ль же косте́м се́рдце чу́вственно. Оклевета́яй убо́гаго, раздража́ет Сотво́ршаго и́: почита́яй же Его́, ми́лует ни́щаго. Во зло́бе свое́й отри́нется нечести́вый: наде́яй же ся на Го́спода, свои́м преподо́бием пра́веден. В се́рдце бла́зе му́жа почи́ет прему́дрость: в се́рдцы же безу́мных не познава́ется. Пра́вда возвыша́ет язы́к, умаля́ют же племена́ греси́. Прия́тен царе́ви слуга́ разу́мный: свои́м же благообраще́нием оте́млет безче́стие. Гне́в губи́т и разу́мныя: отве́т же смире́н отвраща́ет я́рость, а сло́во же́стоко воздвиза́ет гне́вы. Язы́к му́дрых до́брая све́сть: уста́ же безу́мных возвеща́ют зла́я. На вся́ком ме́сте о́чи Госпо́дни сматря́ют злы́я же и благи́я. Исцеле́ние язы́ка дре́во жи́зни: храня́й же его́, испо́лнится ду́ха.

Иере́й: Мир ти.

Чтец: И ду́хови твоему́.

СТИХИ́РЫ НА СТИХО́ВНЕ, ГЛАС 7:

Канона́рх: Глас седьмы́, Я́коже впады́й в разбо́йники и уя́звен.

Стихи́ра Трио́ди, глас 7:

Я́коже впады́й в разбо́йники и уя́звен, та́ко и а́з впадо́х от мои́х грехо́в, и уя́звена е́сть душа́ моя́: к кому́ прибе́гну исцели́тися? то́кмо к Тебе́ ду́ш же и теле́с врачу́: изле́й на мя́ Бо́же вели́кую Твою́ ми́лость.

Стихи́ры Трио́ди, глас 4:

Сти́х: К Тебе́ возведо́х о́чи мои́, живу́щему на небеси́. Се я́ко о́чи раб в руку́ госпо́дий свои́х, я́ко о́чи рабы́ни в руку́ госпожи́ своея́, та́ко о́чи на́ши ко Го́споду Бо́гу на́шему, до́ндеже уще́дрит ны.

Прегреши́вше от преступле́ния пе́рваго, от ра́йския сла́дости и наслажде́ния веде́ни бы́хом в безче́стнейшую жи́знь: доброде́телей бо подоба́ющаго и хва́льнаго жития́ совле́кшеся прегреше́ньми, я́ко в разбо́йники впадо́хом: и́сполу же ме́ртвы есмы́, прегреши́вше от спаси́тельных уче́ний Твои́х, но мо́лим Тя́ от Мари́и яви́вшагося, и безстра́стно страсте́м прибли́жившагося Влады́ку: обяжи́ на́шя я́же от греха́ прибы́вшыя стру́пы, и безме́рное Твое́ милосе́рдие излива́й на ны́, Твое́ исцели́тельное попече́ние, я́ко Человеколю́бец.

Сти́х: Поми́луй нас, Го́споди, поми́луй нас, я́ко по мно́гу испо́лнихомся уничиже́ния: наипа́че напо́лнися душа́ на́ша поноше́ния гобзу́ющих, и уничиже́ния го́рдых.

Святы́х му́ченик прие́мый терпе́ние, и от на́с приими́ пе́ние Человеколю́бче, да́руя на́м те́х моли́твами ве́лию ми́лость.

Сла́ва и ны́не, Богоро́дичен, глас то́йже:

От все́х бе́д рабы́ Твоя́ сохраня́й, благослове́нная Богоро́дице: да Тя́ сла́вим наде́жду ду́ш на́ших.

ТРОПАРИ́ ПО ТРИСВЯТО́М:

[Ноты тропарей ниже]

Тропа́рь (постовым напевом), глас 4:

Богоро́дице Де́во, ра́дуйся, Благода́тная Мари́е, Госпо́дь с Тобо́ю: благослове́нна Ты в жена́х, и благослове́н Плод чре́ва Твоего́, я́ко Спа́са родила́ еси́ душ на́ших. (Поклон)

Сла́ва:

Крести́телю Христо́в, всех нас помяни́, да изба́вимся от беззако́ний на́ших: тебе́ бо даде́ся благода́ть моли́тися за ны. (Поклон)

И ны́не:

Моли́те за ны святи́и апо́столи, святи́и вси, да изба́вимся от бед и скорбе́й: вас бо те́плыя предста́тели ко Спа́су стяжа́хом. (Поклон)

Под Твое́ благоутро́бие прибега́ем, Богоро́дице, моле́ния на́ша не пре́зри во обстоя́нии: но от бед изба́ви ны, еди́на Чи́стая, еди́на Благослове́нная. (Без поклона.)

ОКОНЧА́НИЕ ВЕЧЕ́РНИ:

Чтец: Бу́ди И́мя Госпо́дне благослове́но от ны́не и до ве́ка. (Трижды).

Чтец: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Читается псало́м 33.

Иере́й: Прему́дрость.

Хор: Достойно есть яко воистину блажити Тя Богородицу, Присноблаженную и Пренепорочную и Матерь Бога нашего.

Иере́й: Пресвята́я Богоро́дице, спаси́ нас.

Хор: Честне́йшую Херуви́м и Сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу, Тя велича́ем.

Иере́й: Сла́ва Тебе́, Христе́ Бо́же, Упова́ние на́ше, сла́ва Тебе.

Хор: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь. Го́споди, поми́луй. (Три́жды) Благослови́.

Иере́й: Произносит отпуст.

Хор: Вели́каго Господи́на…