Нача́ло инди́кта, си́речь но́ваго ле́та. И преподо́бнаго отца́ на́шего Симео́на Сто́лпника и архимандри́та и ма́тери его́ Ма́рфы. И святы́х му́чениц 40 жен и свята́го Амму́на диа́кона, учи́теля их:

ВЕЧЕ́РНЯ:

СТИХИРЫ НА ГО́СПОДИ ВОЗЗВА́Х:

Стихи́ры инди́кта, глас 1:

Самосло́внаго и Боже́ственнаго уче́ния Христо́ва/ моли́тве научи́вшеся,/ на вся́к де́нь возопии́м Зижди́телю:/ О́тче на́ш, И́же на Небесе́х обита́яй,/ насу́щный хле́б подава́й на́м,// презира́я на́ша прегреше́ния.

И́же на Сина́йстей горе́/ скрижа́ли написа́в иногда́,/ Са́м и ны́не во гра́де Назаре́те по пло́ти/ кни́гу прия́л еси́ проро́ческую почести́, Христе́ Бо́же,/ и, сию́ согну́в, учи́л еси́ лю́ди// испо́лнитися Писа́нию о Тебе́.

Я́коже евре́ев телеса́ в пусты́ни иногда́,/ не покори́вшихся и́стинно Тебе́, все́х Влады́це,/ досто́йно падо́ша,/ та́ко и ны́не ко́сти разсы́пли/ злочести́вых и неве́рных ага́рян,// псало́мски, при а́де, Христе́.

Стихи́ры преподо́бного, глас 5:

Преподо́бне о́тче,/ а́ще бы возмо́жно столпу́ веща́ти,/ не бы преста́л вопи́ти твоя́ боле́зни,/ труды́ и рыда́ния,/ Но о́н носи́мь бя́ше, не́же ноша́ше,/ я́ко дре́во, напая́емо слеза́ми твои́ми./ Удиви́шася а́нгели, учуди́шася челове́цы,/ устраши́шася де́мони терпе́ния твоего́,/ Симео́не преподо́бне,// моли́ спасти́ся душа́м на́шым.

Преподо́бне о́тче,/ си́лою Боже́ственнаго Ду́ха/ Влады́це твоему́ подо́бяся/ на сто́лп вше́л еси́, я́ко на Кре́ст./ Но О́н рукописа́ние все́х растерза́,/ ты́ же воста́ния страсте́й разруши́л еси́,/ О́н я́ко овча́, ты́ же я́ко заколе́ние,/ О́н взы́де на Кре́ст, ты́ же на сто́лп,/ Симео́не преподо́бне,// моли́ спасти́ся душа́м на́шым.

Преподо́бне о́тче,/ те́ло омочи́в слеза́ми/ и ду́шу очи́стив,/ на высоту́ возше́л еси́ доброде́телей;/ чу́вственное у́бо жили́ще име́я сто́лп тво́й,/ мы́сленный же и Небе́сный гра́д го́рний Сио́н,/ а́нгелы удиви́л еси́, челове́ки ужаси́л еси́,/ де́моны посрами́л еси́ доброде́тельми твои́ми,/ Симео́не преподо́бне,// моли́ спасти́ся душа́м на́шым.

И́ны стихи́ры преподо́бного, глас 2:

От ко́рене блага́го благи́й прозябе́ пло́д,/ от младе́нства свяще́нный Симео́н/ благода́тию па́че не́же млеко́м воспита́н,/ и, на ка́мень те́ло возвы́сив,/ к Бо́гу же превозвы́сив ра́зум,/ Небе́сное созда́ доброде́тельми жили́ще,/ и, с боже́ственными Си́лами лико́вне ше́ствуя./ Христа́ бы́сть жили́ще,// Бо́га и Спа́са ду́ш на́ших.

Па́мять твоя́ во ве́к пребыва́ет,/ преподо́бне о́тче Симео́не,/ и кро́тость се́рдца твоего́, уго́дниче Христо́в блаже́нне./ А́ще бо и преста́вился еси́ от на́с, па́стырю до́брый,/ но не отступа́еши от на́с ду́хом,/ в любви́ Бо́гу предстоя́/ и со а́нгелы лику́я на небесе́х,// с ни́миже моли́ спасти́ся душа́м на́шым.

Моще́й твои́х ра́ка, всехва́льне о́тче,/ источа́ет исцеле́ния,/ и свята́я твоя́ душа́, со а́нгелы совоку́пльшися, досто́йно ра́дуется./ Име́я у́бо ко Го́споду, преподо́бне, дерзнове́ние/ и со безпло́тными лику́я на Небесе́х,// с ни́миже моли́ спасти́ся душа́м на́шым.

Возлюби́л еси́, богоно́се, го́рнейшее любому́дрие,/ и вне́ мі́ра бы́л еси́,/ живы́й вы́шше ви́димых,/ и зерца́ло нескве́рно Бо́жие боже́ственно показа́лся еси́,/ и, сы́й при́сно соединя́яся Све́ту,/ Све́т приима́л еси́,/ и ясне́йший, блаже́нне, получи́л еси́ коне́ц.// Моли́ся о душа́х на́ших, му́дре Симео́не.

Сла́ва, стихи́ра преподо́бного, глас 6:

Боже́ственная благода́ть/ осеня́ет ра́ку моще́й твои́х,/ освяще́нный Симео́не,/ те́мже и, в воню́ ми́ра чуде́с твои́х притека́юще,/ неду́гов исцеле́ние почерпа́ем./ Но, о́тче преподо́бне,// Христа́ Бо́га моли́ о душа́х на́ших.

И ны́не, стихи́ра инди́кта, глас то́йже:

И́же со Ду́хом Святы́м соедине́н,/ Безнача́льне Сло́ве и Сы́не,/ все́х ви́димых и неви́димых Соде́телю и Зижди́телю,/ вене́ц ле́та благослови́,/ сохраня́я в ми́ре правосла́вных мно́жества// моли́твами Богоро́дицы и все́х святы́х Твои́х.

ПАРЕМИ́И:

Инди́кта:

Проро́чества Иса́иина чтение (глава́ 61):

Дух Госпо́день на Мне, Его́же ра́ди пома́за Мя, благовести́ти ни́щим посла́ Мя, исцели́ти сокруше́нныя се́рдцем, пропове́дати пле́нником отпуще́ние и слепы́м прозре́ние, пропове́дати ле́то Госпо́дне прия́тно и день воздая́ния Бо́га на́шего, уте́шити вся пла́чущия, да́ти пла́чущим Сио́н, сла́ву вме́сто пе́пела, пома́зание весе́лия пла́чущим, одея́ние сла́вы вме́сто ду́ха уны́ния, и нареку́тся ро́ди пра́вды, насажде́ние Госпо́дне в сла́ву. И сози́ждут пусты́ни ве́чныя, запусте́вшия пре́жде воздви́гнут, и обновя́т гра́ды пусты́я, запусте́вшия от ро́да в род. И прии́дут иноро́днии, пасу́ще о́вцы Твоя́, и иноплеме́нницы ра́таи, и виногра́дари ва́ши, Вы же свяще́нницы Госпо́дни нарече́теся, служи́телие Бо́га ва́шего. Рече́тся вам: кре́пость язы́ков поя́сте и в бога́тстве их чу́дни бу́дете, вме́сто стыде́ния ва́шего сугу́баго и вме́сто срамоты́, возра́дуется часть их. Сего́ ра́ди зе́млю свою́ втори́цею насле́дят, и весе́лие ве́чное над главо́ю их: Аз бо есмь Госпо́дь, любя́й пра́вду и ненави́дяй хище́ния от непра́вды. И дам труд их пра́ведником и Заве́т ве́чен завеща́ю им. И позна́ется во языцех се́мя их, и вну́цы их посреде́ люде́й. Всяк ви́дяй их позна́ет я, я́ко си́и суть се́мя, благослове́нное от Бо́га, и весе́лием возвеселя́тся о Го́споде.

Леви́тских книг чте́ние (глава́ 26):

Глаго́ла Госпо́дь сыно́м изра́илевым глаго́ля: а́ще в повеле́ниих Мои́х хо́дите, и за́поведи Моя́ сохраните́, и сотворите́ я́: и дам вам дождь во вре́мя его́, и земля́ даст рожде́ния своя́, и древа́ по́льная отдадя́т плод свой. И пости́гнет вас млаче́ние, обра́ние вина́, и вина́ обра́ние пости́гнет се́ятву, и сне́сте хлеб ваш в сы́тость, и вселите́ся с тве́рдостию на земли́ ва́шей. И дам мир в земли́ ва́шей, и у́спнете, и не бу́дет вас устраша́яй. И погублю́ зве́ри лю́тыя от земли́ ва́шея, и брань не про́йдет сквозе́ зе́млю ва́шу. И пожене́те враги́ ва́ша, и паду́т пред ва́ми убие́ни. И пожене́те пять из вас сто, и сто вас пожене́те тьмы. И паду́т врази́ ва́ши пред ва́ми мече́м. И при́зрю на вы, и возблагословлю́ вы, и возращу́ вы, и умно́жу вы, и положу́ заве́т Мой с ва́ми. И сне́сте ве́тхая, и ве́тхая ве́тхих, и ве́тхая от лица́ но́вых изнесе́те. И положу́ заве́т Мой в вас, и не возгнуша́ется душа́ Моя́ ва́ми. И похожду́ в вас, и бу́ду вам Бог, и вы бу́дете мне лю́дие. А́ще же не послу́шаете Мене́, ниже́ сотворите́ повеле́ний Мои́х сих, но ни покорите́ся им, и суде́б Мои́х вознегоду́ет душа́ ва́ша, я́коже вам не твори́ти всех за́поведей Мои́х и я́ко разори́ти заве́т Мой, и Аз сотворю́ си́це вам: наведу́ на вы ску́дость, и се́ете вотще́ се́мена ва́ша, и изъядя́т труды́ ва́ша проти́внии ва́ши. И поста́влю лице́ Мое́ на вы, и паде́те пред враги́ ва́шими, и пожену́т вы ненави́дящии вас, и побе́гнете никому́же гоня́щу вас. И сокрушу́ досажде́ние горды́ни ва́шея, и положу́ не́бо вам я́ко желе́зно и зе́млю ва́шу я́ко ме́дяну. И бу́дет вотще́ кре́пость ва́ша, и земля́ ва́ша не даст се́мене своего́, и древа́ се́льная не дадя́т плода́ своего́. И послю́ на вы зве́ри ди́вия земны́я, и поядя́т вас, и потребя́т ско́ты ва́ша, и ума́лены сотворю́ вы, и погуби́т вы находя́й меч. И бу́дет земля́ ва́ша пуста́, и дворы́ ва́ши бу́дут пу́сты, я́ко вы ходи́сте ко Мне страно́ю, и Аз пойду́ к вам в я́рости страно́ю: глаго́лет Госпо́дь Бог, Святы́й Изра́илев.

Преподо́бного:

Прему́дрости Соломо́новы чте́ние (глава́ 4):

Пра́ведник, а́ще пости́гнет сконча́тися, в поко́и бу́дет: ста́рость бо честна́ не многоле́тна, ниже́ в числе́ ле́т исчита́ется. Седи́на же е́сть му́дрость челове́ком, и во́зраст ста́рости житие́ нескве́рно. Благоуго́ден Бо́гу бы́в, возлю́блен бы́сть, и живы́й посреде́ гре́шник преста́влен бы́сть, восхище́н бы́сть, да не зло́ба измени́т ра́зума его́ или́ ле́сть прельсти́т ду́шу его́. Раче́ние бо зло́бы помрача́ет до́брая и паре́ние по́хоти пременя́ет у́м незло́бив. Сконча́вся вма́ле, испо́лни ле́та до́лга, уго́дна бо бе́ Го́сподеви душа́ его́, сего́ ра́ди потща́ся от среды́ лука́вствия. Лю́дие же ви́девше и не разуме́вше, ниже́ поло́жше в помышле́нии таково́е, я́ко благода́ть и ми́лость в преподо́бных Его́ и посеще́ние во избра́нных Его́.

СТИХИ́РЫ НА СТИХО́ВНЕ

Стихи́ры инди́кта, глас 1:

Наста́ вхо́д ле́та,/ созыва́ющ почита́ти того́ просвеща́ющия,/ Калли́сту, Ево́да и Ермоге́на,/ самобра́тныя страда́льцы,/ Симео́на равноа́нгельнаго и Иису́са Нави́на,/ и́же во Ефе́се седмочи́сленныя о́троки/ и четверодесятосве́тлый святы́х же́н ли́к./ И́хже па́мятем приобща́ющеся, празднолю́бцы, возопии́м благоче́стно:/ Го́споди, благослови́ дела́ ру́к Твои́х// и сподо́би ны́ до́бре преити́ ле́та обхожде́ние.

Сти́х: Тебе́ подоба́ет пе́снь, Бо́же, в Сио́не,/ и Тебе́ возда́стся моли́тва во Иерусали́ме.

Христе́ Бо́же на́ш, И́же му́дростию вся́ соде́явый/ и из не су́щих во е́же бы́ти приведы́й,/ благослови́ вене́ц ле́та,/ и гра́ды на́ша сохраня́й невре́дны,/ и ве́рныя лю́ди си́лою Твое́ю возвесели́,/ побе́ды дая́ на сопоста́ты,/ Богоро́дицы ра́ди,// да́руя мі́ру ве́лию ми́лость.

И́ны стихи́ры инди́кта, глас 2:

Сти́х: Испо́лнимся во благи́х до́му Твоего́,/ свя́т хра́м Тво́й, ди́вен в пра́вде.

Ди́вен еси́, Бо́же, и чу́дна дела́ Твоя́,/ и путие́ Твои́ неизсле́дими:/ еси́ бо Му́дрость Бо́жия, и Ипоста́сь соверше́нна, и Си́ла,/ Собезнача́лен же и Соприсносу́щен,/ и соде́тельною всеси́льною вла́стию в мір прише́л еси́,/ ища́ е́же удобри́ти созда́ние Твое́,/ неизрече́нне от неискусому́жныя Ма́тере, не превра́щся Божество́м,/ завеща́в уста́вы и ле́та/ во спасе́ние на́ше неизме́нне./ Сего́ ра́ди вопие́м Ти́:// Благи́й Го́споди, сла́ва Тебе́.

Сти́х: Благослови́ши вене́ц ле́та/ бла́гости Твоея́, Го́споди.

И́же в му́дрости вся́ соде́тельствовавый,/ Преве́чное Сло́во Ѻ́тчее,/ и вся́ческую тва́рь всеси́льным сло́вом Твои́м соста́вивый,/ благослови́ вене́ц ле́та бла́гости Твоея́/ и е́реси низложи́, Богоро́дицы ра́ди,// я́ко Бла́г и Человеколю́бец.

Сла́ва, стихи́ра преподо́бного, глас 5:

Преподо́бне о́тче,/ добру́ изобре́л еси́ ле́ствицу,/ е́юже возше́л еси́ на высоту́,/ ю́же обре́те Илия́ колесни́цу о́гненну,/ но о́н у́бо восхо́да ины́м не оста́ви,/ ты́ же и по сме́рти и́маши сто́лп тво́й./ Небе́сный челове́че, земны́й а́нгеле,/ свети́льниче неусы́пный вселе́нныя,/ Симео́не преподо́бне,// моли́ е́же спасти́ся душа́м на́шым.

И ны́не, стихи́ра инди́кта, глас то́йже:

Ты́, Царю́, сы́й при́сно/ и пребыва́яй и во ве́ки безконе́чныя,/ приими́ моле́ние гре́шных, прося́щих спасе́ния,/ и пода́ждь, Человеколю́бче, земли́ Твое́й благопло́дие,/ благорастворе́ны возду́хи да́руя,/ спобо́рствуй на безбо́жныя ва́рвары,/ я́коже иногда́ Дави́ду,/ я́ко приидо́ша си́и во оби́тели Твоя́/ и всесвято́е ме́сто оскверни́ша, Спа́се,/ но Ты́ да́руй правосла́вным христиа́ном побе́ды, Христе́ Бо́же,/ моли́твами Богоро́дицы,// Побе́да бо Ты́ правосла́вных и Хвала́.

ТРОПАРИ́:

Тропа́рь инди́кта, глас 2:

Всея́ тва́ри Соде́телю,/ времена́ и ле́та во Свое́й вла́сти положи́вый,/ благослови́ вене́ц ле́та бла́гости Твоея́, Го́споди,/ сохраня́я в ми́ре лю́ди и гра́д Тво́й,// моли́твами Богоро́дицы, и спаси́ ны́.

Сла́ва, тропа́рь преподо́бного, глас 1:

Терпе́ния сто́лп бы́л еси́,/ ревнова́вый пра́отцем, преподо́бне,/ И́ову во страсте́х, Ио́сифу во искуше́ниих,/ и безпло́тных жи́тельству, сы́й в телеси́,/ Симео́не, о́тче на́ш,// моли́ Христа́ Бо́га спасти́ся душа́м на́шым.

И ны́не, Богоро́дичен, глас 1:

Ра́дуйся, обра́дованная Богоро́дице Де́во,/ приста́нище и предста́тельство ро́да челове́ческаго,/ из Тебе́ бо воплоти́ся Изба́витель ми́ра,/ еди́на бо еси́ Ма́ти и Де́ва,/ присноблагослове́нная и препросла́вленная,// моли́ Христа́ Бо́га ми́р дарова́ти все́й вселе́нней.

У́ТРЕНЯ:

СЕДА́ЛЬНЫ ПО КАФИ́ЗМАМ:

По 1-м стихосло́вии седа́лен инди́кта, глас 4:

Я́ко Влады́це все́х и Пода́телю благи́х, / Тебе́ припа́даем ве́рно, вопию́ще приле́жно: / от Твоего́ умоля́емь благоутро́бия, Спа́се, / и моли́твами Ро́ждшия Тя́ и все́х при́сно благоугожда́ющих Тебе́, / ле́то благоприя́тно принести́ Тебе́, я́ко Бла́г, сподо́би, // во дву́ существу́ честву́ющих и ве́рно сла́вящих Тя́.

Сла́ва, седа́лен преподо́бного, глас 8:

Кре́ст Госпо́день взе́м, му́дре, / и Тому́ до конца́ после́довав, / умо́м не возврати́лся еси́ в мир, богому́дре, / воздержа́нием и труды́ стра́сти умертви́в, / и хра́м угото́вил еси́ себе́ Го́споду твоему́. / Те́мже и дарова́ний возме́здие прия́л еси́, / исцеля́ти неду́жныя и ду́хи отгони́ти, / Симео́не преподо́бнейший, / моли́ Христа́ Бо́га грехо́в оставле́ние пода́ти // пра́зднующим любо́вию святу́ю па́мять твою́.

И ны́не, седа́лен инди́кта: Я́ко Влады́це всех: смотри́ вы́ше.

По 2-м стихосло́вии седа́лен преподо́бного, глас 8:

Воздержа́нием, и труды́, и моли́твами ду́шу твою́ обучи́в боголе́пне, / бы́л еси́ соприча́стник му́чеником, блаже́нне, / и чуде́с и́стинно дарова́ния прия́л еси́, / исцеля́ти неду́ги ве́рою честву́ющих тя́. / Те́мже и де́монския отгоня́еши полки́, / на сия́ свы́ше вла́стию да́нною тебе́, Симео́не преблаже́нне, / моли́ Христа́ Бо́га согреше́ний оставле́ние дарова́ти // пра́зднующим любо́вию святу́ю па́мять твою́.

Сла́ва, седален мученицы, глас 4:

Вошла́ еси́ в по́двиг муче́ния ве́рно, Калли́сто, / пропове́дающи со двема́ бра́ты Христа́ Бо́га на́шего, / жела́нием бо воспита́на, мы́сленныя сосу́ды и́стинно Христо́вы Це́ркве соверши́ла еси́ си́х. // Те́мже сочета́лася еси́ и́м, му́ченице, в вы́шнюю жи́знь.

И ны́не, Богоро́дичен, глас то́йже:

Ско́ро приими́, Влады́чице, мольбы́ на́ша / и сия́ принеси́ Твоему́ Сы́ну и Бо́гу, Госпоже́ Всечи́стая, / разреши́ обстоя́ния к Тебе́ притека́ющих, разруши́ наве́ты и де́рзости, Де́во, // ны́не вооружа́ющихся на рабы́ Твоя́.